Лінгвістыка ў лічбавую эпоху

Канферэнцыя «Мова ў эпоху лічбавых трансфармацый і развіцця штучнага інтэлекту» праводзілася ў Беларускім дзяржаўным універсітэце замежных моў другі раз, пацвердзіўшы свой міжнародны статус і пашырыўшы сваю геаграфію. У канферэнцыі прынялі ўдзел навукоўцы і даследчыкі з Рэспублікі Беларусь, Расійскай Федэрацыі, Рэспублікі Азербайджан, Кітайскай Народнай Рэспублікі, Іспаніі, Рэспублікі Узбекістан і Японіі. У іх ліку-22 дактары навук, 63 кандыдаты навук, аспіранты, дактаранты, магістранты і студэнты.

Першы дзень пачаўся з урачыстага адкрыцця канферэнцыі, у рамках якога з прывітальным словам да ўсіх удзельнікаў звярнулася прарэктар Беларускага дзяржаўнага ўніверсітэта замежных моў па вучэбнай рабоце Алена Пятроўна Беценя.

У фармаце відэазапісу прывітальную частку працягнуў прарэктар Другога Пекінскага ўніверсітэта замежных моў (BISU) Чжэн Чэньцзюнь (Кітайская Народная Рэспубліка). Чжэн Чэньцзюнь падкрэсліў актуальнасць тэматыкі канферэнцыі, падзяліўся вопытам укаранення штучнага інтэлекту пры выкананні навуковых даследаванняў у BISU і выказаў упэўненасць у перспектыўнасці далейшага супрацоўніцтва паміж універсітэтамі.

Праграма першага дня канферэнцыі працягнулася двума пленарнымі пасяджэннямі, на якіх з дакладамі выступілі 11 вядомых і аўтарытэтных навукоўцаў, вядучых спецыялістаў у галіне корпуснай і камп'ютарнай лінгвістыкі, лінгвістыкі тэксту і дыскурсу, эксперыментальнай фанетыкі.

Праблематыка, зададзеная пленарнымі пасяджэннямі, вызначыла вектар далейшых абмеркаванняў у рамках секцый, якія адбыліся ў другі дзень. На 6 дыскусійных пляцоўках былі прадстаўлены 92 даклады, якія раскрылі ключавыя аспекты сучаснай лічбавай лінгвістыкі. Шэраг выступаў быў прысвечаны аўтаматычнай апрацоўцы натуральнай мовы, камп’ютарнай лексікаграфіі і корпусным даследаванням, дзе разглядаліся як вопыт, так і перспектывы гэтых тэхналогій. Асаблівая ўвага надавалася сферы адукацыі. Навукоўцы абмяркоўвалі, як лічбавыя тэхналогіі і штучны інтэлект трансфармуюць моўную падрыхтоўку, закранаючы псіхолага-педагагічныя аспекты гэтага працэсу і ствараючы новыя падыходы да навучання перакладу. Дакладчыкі аналізавалі асаблівасці мультымадальнай камунікацыі ў віртуальнай прасторы, ролю нейрасетак у медыяпрасторы і прымяненне лічбавых тэхналогій у міжкультурнай камунікацыі. Шматлікія даследаванні насілі міждысцыплінарны характар, дэманструючы магутны патэнцыял аналізу тэкставых даных для вырашэння комплексных навуковых задач.

Вынікам двухдзённай інтэнсіўнай працы ў рамках II Міжнароднай навуковай канферэнцыі «Мова ў эпоху лічбавых трансфармацый і развіцця штучнага інтэлекту» стала публікацыя зборніка навуковых артыкулаў.

Можна з упэўненасцю сцвярджаць, што канферэнцыя выканала сваю галоўную задачу-аб'яднала намаганні навукоўцаў з розных краін для пошуку адказаў на выклікі, якія лічбавая трансфармацыя ставіць перад мовай і камунікацыяй.